ଦଶପଲ୍ଲା : ଦଶପଲ୍ଲା ଥାନା ଅଧିକାରୀ ବିନୟ ରଞ୍ଜନ ପରିଡ଼ାଙ୍କ କାର୍ଯ୍ୟ ଦକ୍ଷତା ପୋଲିସ ଉପରେ ସାଧାରଣ ଜନତାଙ୍କ ଆସ୍ଥାକୁ ଅଧିକ ମଜବୁତ କରିଛି। ମାମଲା ଛୋଟ ହେଉ ଅବା ବଡ଼, ପ୍ରତିଟି ଘଟଣାକୁ ସେ ସମାନ ଗୁରୁତ୍ୱ ସହ ଗ୍ରହଣ କରି ତୁରନ୍ତ ସମାଧାନ ଦିଗରେ କାର୍ଯ୍ୟ କରି ଚର୍ଚାକୁ ଆସିଛନ୍ତି।ଥାନାର ଦାୟିତ୍ୱ ନେବା ଦିନଠାରୁ ବିନୟ ରଞ୍ଜନ ପରିଡ଼ା ନିଜ କର୍ତ୍ତବ୍ୟନିଷ୍ଠା ଓ ତତ୍ପରତା ପାଇଁ ସ୍ଥାନୀୟ ଅଞ୍ଚଳରେ ବେଶ ପରିଚିତ। ବେଆଇନ୍ ଗଞ୍ଜେଇ ଚାଲାଣ ହେଉ କି ଗୋରୁ ଚୋରା ଚାଲାଣ – ଅପରାଧୀଙ୍କ ମନରେ ସେ ଛନକା ସୃଷ୍ଟି କରିଛନ୍ତି। ଗତ କିଛି ମାସ ଭିତରେ ତାଙ୍କ ନେତୃତ୍ୱରେ ଦଶପଲ୍ଲା ପୋଲିସ ଏକାଧିକ ଗଞ୍ଜେଇ ଚାଲାଣ ସହ ଗୋରୁ ଚାଲାଣ କାରବାର ଉପରେ ମଧ୍ୟ କଡ଼ା ନଜର ରଖିଛି।କେବଳ ଅପରାଧ ନିୟନ୍ତ୍ରଣ ନୁହେଁ, ମାନବିକତା କ୍ଷେତ୍ରରେ ମଧ୍ୟ ବିନୟ ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି। କୌଣସି ଦୁର୍ଘଟଣା ଖବର ପାଇବା ମାତ୍ରେ ସେ ତୁରନ୍ତ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତଙ୍କୁ ଉଦ୍ଧାର କରି ମେଡିକାଲ ପଠାଇଥାନ୍ତି। ଏତିକିରେ ତାଙ୍କ ଦାୟିତ୍ୱ ସରେନାହିଁ – ଆହତଙ୍କୁ ଉନ୍ନତମାନର ଚିକିତ୍ସା ଯୋଗାଇଦେବା ପାଇଁ ସେ ନିଜେ ମେଡିକାଲରେ ପହଞ୍ଚି ଡାକ୍ତରଙ୍କ ସହ ଆଲୋଚନା କରନ୍ତି ଓ ସମ୍ପୂର୍ଣ୍ଣ ଚିକିତ୍ସା ସୁନିଶ୍ଚିତ କରନ୍ତି।ସ୍ଥାନୀୟ ଲୋକ କୁହନ୍ତି, “ଆଗରୁ ଛୋଟ କଥା ପାଇଁ ଥାନାକୁ ଯିବାକୁ ଡର ଲାଗୁଥିଲା। ଏବେ ସାର୍ ସମସ୍ତଙ୍କ କଥା ଶୁଣୁଛନ୍ତି। ଗରିବ-ବଡ଼ ଭେଦଭାବ ନାହିଁ। ଦୁର୍ଘଟଣା ହେଲେ ବି ପୋଲିସ ପ୍ରଥମେ ପହଞ୍ଚୁଛି। ନ୍ୟାୟ ମିଳିବ ବୋଲି ଭରସା ଆସିଛି।”ବିନୟ ରଞ୍ଜନ ପରିଡ଼ାଙ୍କ କହିବା ଅନୁଯାୟୀ, “ପୋଲିସର ପ୍ରଥମ କାମ ହେଉଛି ଜନତାଙ୍କ ସେବା। ପ୍ରତିଟି ଅଭିଯୋଗ ଆମ ପାଇଁ ଗୁରୁତ୍ୱପୂର୍ଣ। ଅପରାଧ ନିୟନ୍ତ୍ରଣ ସହ ବିପଦ ସମୟରେ ଲୋକଙ୍କ ପାଖରେ ଠିଆ ହେବା ମୋର ଲକ୍ଷ୍ୟ। ଜଣେ ଆହତ ବ୍ୟକ୍ତିଙ୍କ ଜୀବନ ବଞ୍ଚାଇବା କୌଣସି କେସ୍ ସଲଭ୍ କରିବାଠାରୁ କମ୍ ନୁହେଁ।”ତାଙ୍କର ଏହି ଲୋକାଭିମୁଖୀ କାର୍ଯ୍ୟଶୈଳୀ ଯୋଗୁଁ କେବଳ ଅପରାଧ ହାର କମିନି, ବରଂ ପୋଲିସ ଓ ଜନତା ଭିତରେ ଥିବା ଦୂରତା ମଧ୍ୟ କମିଛି। ଦଶପଲ୍ଲା ଭଳି ଅଞ୍ଚଳରେ ଶାନ୍ତି ଶୃଙ୍ଖଳା ରକ୍ଷା ଦିଗରେ ତାଙ୍କ ଭୂମିକାକୁ ବିଭିନ୍ନ ମହଲରେ ପ୍ରଶଂସା କରାଯାଉଛି।
